هاجم مرتضى منصور رئيس الزمالك عبدالواحد السيد حارس مرمى الفريق بعدما هدد بشكوى النادى اعتراضًا على عدم صرف مستحقاته المتأخرة.
ووجه مرتضى حديثه لعبدالواحد قائلًا: "هو انت ياتلعب بالعافية ياتشتيكينى؟! ده انت كنت عامل 2 صليبى واتعاقدت معاك تكريًما ليك، إدونى فلوسى إيه هو انت خدت بطولات، مش مكسوف؟!.
وأضاف مرتضى:" أنا لو مكانك احترم نفسى واعتزل، ماحنا شوفنا جون خالد قمر وجون جون انطوى لما اداله الكورة علشان يجيب الجون".
ورد على تصريحات عبدالواحد بأنه سيخوض الانتخابات المقبلة وسيكون رئيس الزمالك القادم قائلًا: "ياما!، خوفت أنا، يابنى هو انت أصلًا عضو فى النادى، تعالى ياعم واستلم النادى من دلوقتى، دى تركة كلها هموم".
وكشف مرتضى عن أنه تدخل لإقناع الجهاز الفنى لحضور عبدالواحد نهائى كأس مصر ورفع الكأس بنفسه، مُكملًا: "عبدالواحد قال لو حازم إمام اللى هو كان الكابتن وقتها لمس الكاس همشى واستحملناك".
وواصل رئيس الزمالك: "إحنا مبنخافش، لو عاوز يشتكى يشتكى، عبدالواحد كان بقاله 7 مليون و300 ألف جنيه، فى الـ3 أشهر بتوعى واخد مليون و300 ألف وعباس مدالوش مليم، كنت فين يابو شنب ساعتها؟ مانت ساكت سنين".
وأبدى مرتضى استيائه من فتح عبدالواحد مسألة حصوله على مستحقاته رغم أن الفريق مقبل على مباراة مهمة غدًا أمام مازيمبى الكونغولى فى ربع نهائى دورى أبطال أفريقيا.
