|
ظهر إسلام عوض لاعب كرة القدم الأول بنادى الزمالك, ضيفاً
مع الإعلامى طارق يحيى فى برنامج " الملاعب اليوم " على قناة الحياة 2, وتلخص حواره فى الآتى:-
- نفسى أقدم فى الزمالك المستوى المتميز اللى كنت بقدمه فى إنبى, للأسف أول ماجيت الظروف كلها وقفت ضدى لإن النشاط إتوقف, وملقتش المساندة المطلوبة من المدرب عشان أقف على رجلى وأجيب فورمة, خصوصاً إنى على طول بنزل أوقات قليلة فى كل ماتش, وأول مرة ألعب 90 دقيقة كان أدام الأهلى .
- أنا لسه مش شايف نفسى مع الزمالك, بس الماتش ده كنت واقف على رجلى ولياقتى كويسة, كان مطلوب منى أوقف سيد معوض, وده اللى مخلانيش أقدم المستوى الهجومى المعروف عنى .
- ماركو مدرب بدنى كويس أوى, فييرا مدينى ثقة كبيرة, وإن شاء الله أفيد نادى الزمالك وأقدم مستوى متميز الفترة الجاية .
- جدول أفريقيا مكانش فى صالحنا ومكناش موفقين, اللاعيبة مش واثقة فى بعض وبنجيب جون وندافع وده عيب, لكن فى ماتش الأهلى الوضع كان مختلف كان فى تكتيك واضع ودفاع منظم وروح .
- الزمالك محتاج لاعيب أو إتنين بالكتير, لإن المجموعة الموجودة مميزة, ويقدروا يعوضوا رحيل شيكا وميدو وزكى, رغم إنى بتمنى يرجعوا .
- الزمالك مفيهوش هدوء خصوصاً من ناحية الإعلام, فى حاجات كتير بتحصل فى الأهلى محدش بيتكلم عنها, ودى مشكلة النادى فى المقام الأول لإنه المفروض يسيطر على الجانب ده .
- بقول للجمهور إنتوا عارفين أنا بحب النادى إزاى وجيت بطريقة صعبة, نفسى أعملهم حاجات كتير, الدورى راجع وهيشوفوا مستوى الزمالك وإسلام عامل إزاى, إحنا على الطريق الصحيح بس مش عاوزهم يستعجلوا, مستوانا هيبقى أحسن وإن شاء الله نجيبلهم بطولة .
شاهد الفيديوهات
|
