علق اللاعب محمد مجدي لاعب طائرة الزمالك على انتهاء أزمته اليوم مع النادي برعاية هشام نصر المرشح على منصب نائب رئيس النادي
تلك الأزمة التي كانت تتعلق بمستحقات اللاعب وتم الإعلان اليوم عن إنهاء تلك الأزمة
طالع .. هشام نصر يعلن انتهاء أزمة لاعب طائرة الزمالك
محمد مجدي وعبر حسابه على موقع التواصل الاجتماعي فيسبوك قائلا:
الحمد لله والشكر لله
بفضل ربنا سبحانه وتعالي وبفضل ناس بتحب الزمالك.. النادي اللي بفخر دايما بتمثيله كلاعب منذ ١٧ سنة وتشجعيه كمشجع
تم التواصل معي لحل المشاكل التي كنت اواجهها الفترة الماضية وبدأ الحمد لله حلها
وبناء عليه تم التنازل عن الشكوي التي تم تقديمها بعد مماطلة المجلس القديم في حل والتواصل مع لاعبين النادي اللي بيحبوا النادي وبيمثلوه وقدروا انهم يحققوا بعرقهم وتعبهم البطولات رغم كل الصعوبات اللي واجهناها الفترة الماضية
بداية..أوجه الشكر للكابتن/ هشام نصر
الراجل اللي قدر محبي الزمالك انهم يوصلوا مشاكلي اللي بتتمثل في عدم حصولي علي مستحقاتي واللي تجاهلها كل المسئولين الفترة الماضية في حلها.. او التواصل مع أي مسئول يقدر يستوعب اللاعبين ويفهم مشاكلهم ويطمنهم..احنا في النهاية ورانا مسئوليات وأسر وعائلات وده مصدر رزقي..فمش عاوز حد يزعل مني ابداً لما بتلاقي نفسك قليل الحيلة بتضطر الظروف انك تعمل حاجات عشان حد يحس بيك
الأخ الكبير الكابتن هشام نصر..يصفته احد اهم لاعبين كرة اليد سابقا واللي ادري بمشاكل العاب الصالات بحكم احد ابناءها..تواصل معايا وقدر يحل مشكلة التجنيد كمان الخاصة بيه اللي ماكنتش ممكن تخليني امثل الزمالك.. واليوم قدر بالتواصل مع اللجنة المؤقتة صرف جزء من مستحقاتي اللي باقيلها فترة طويلة جداً دون اي اجراء..وأثرت سلباً عليه نفسياً ومادياً ومعنوياً ..ورغم ذلك كنت بروح اتدرب استعداد للموسم الجديد لعل وعسي
عشان كده بشكره جداً علي تفاعله واهتمامه لغاية ما قدر يرد جزء كبير من حقي معنويا وماديا ..وحسستني بقيمتي كلاعب اساسي في الفريق
بشكر كل الناس اللي قدرت تنقل مشاكلي وتحلها الفترة الماضية للناس المسئوله..الناس اللي فعلا اثبتت ان حبها للزمالك هو المحرك ليها بدون اي مصالح وانا حقيقة ماكنتش مستوعب الحب ده دون أي مصلحة واللي كانوا سبب كبير في حل مشكلتي بفضل الله..ورغم انهم ماكنوش حابين ده بس لازم اذكرهم عشان من لا يشكر الناس لا يشكر الله
بشكر المستشار محمد عطية اللي تواصل معايا وتفاعل بشكل كبير في المشكلة وكان دائم الاتصال بيه وحلقة وصل للكابتن هشام نصر.. وقدم دعم كبير جدا في المتابعة ديه
بشكر النقيب حسام مختار اللي قدر يفهم المشكلة وينقلها لأعضاء القائمة الموحدة ويربطنا معاهم
بشكر ا. ايمن لاشين محب الزمالك..اللي كان متواصل معايا وبيحاول يحل المشكلة المالية في القصة
وبشكر صديقي علاء عطا..المشجع الزملكاوي ..اللي قدر يفهم حجم المشكلة وكان اول حد يمكن فهمته ان خلاص ماحدش بيستجيب نهائي لمشكلتي..وقدر يوصلني بكل الناس اللي فوق و بيحبوا الزمالك فعلا ..وتابع معايا اول باول
شكرا جمهور الزمالك العظيم علي دعمكم وحبكم.. وباذن الله هنكمل مشوارنا في رفعة النادي وتحقيق البطولات
عاش الزمالك
محمد مجدي الجون
لاعب نادي الزمالك ومنتخب مصر
